Igandean, maiatzaren 11n, Agurainen aurkeztuko dute Asier Urbietaren Faisaien irla pelikula, Donostiako Giza Eskubideen 22. Zinemaldia ireki zuen filma, euskaraz. 19:00etan izango da, Harresi aretoan.
Jone Laspiur eta Sambou Diaby dira filmaren protagonistak, eta, gainera, Itziar Ituño eta Josean Beangoetxea ere badira ikus-entzunezkoaren parte. Bidasoa inguruan grabatu zuten filma, eta haren gidoia Asier Urbietak eta Andoni de Carlosek idatzi dute.
Faisaien Irla munduko kondominio txikiena da; sei hilabetez Espainiari dagokio, eta beste sei hilabeteak Frantziari. Laida eta Sambouk bi pertsona ikusiko dituzte igerian ibaia zeharkatu ezinik. Egun batzuk geroago gorpu bat agertuko da irlan.